«Yuventus» «Bolonya»ning markaziy himoyachisi Jon Lukumi transferi bo‘yicha kelishuvga erishdi.

Insayder Fabrisio Romano ma’lumotiga ko‘ra, Turin klubi 28 yoshli kolumbiyalik futbolchini xarid qilish masalasida «Bolonya» bilan og‘zaki kelishuvga erishgan. Transfer qiymati bonuslar bilan birga 20 mln yevroni tashkil etadi. Manba odatdagidek transfer yakunlanganini anglatuvchi «Here we go» iborasini ishlatgan. Bu ma’lumot boshqa manbalarda ham tasdiqlanmoqda.

Lukumi 2022 yildan buyon «Bolonya» safida to‘p surib kelmoqda. U Italiya klubidagi ilk o‘yinini o‘sha yilning avgust oyida «Milan»ga qarshi o‘tkazgan.

28 yoshli himoyachi «Bolonya»ning asosiy tarkib futbolchilaridan biriga aylanib, oxirgi yillarda A Seriyada katta tajriba to‘pladi. U 2025/26 yilgi mavsumda barcha musobaqalarda 40 dan ortiq o‘yinda ishtirok etgan. Lukumining «Bolonya» bilan amaldagi shartnomasi 2027 yil yozigacha mo‘ljallangan edi.

Kolumbiyalik futbolchi asosan markaziy himoyachi pozisiyasida harakat qiladi va chap oyoqda o‘ynashi bilan ajralib turadi. Uning transferi «Yuventus»ning yangi mavsum oldidan mudofaa chizig‘ini kuchaytirish rejasining bir qismi hisoblanadi.

Endi Lukumi tibbiy ko‘rikdan o‘tishi va shundan so‘ng «Yuventus» bilan shartnoma imzolashi kutilmoqda.

Manba: Stadion.uz